वस्त्र संस्कृती विषयक कार्यशाळेचे इचलकरंजी येथे आयोजन -पारंपारिक वस्त्र परंपरा आणि आधुनिकता याचा मेळ घालणारी कार्यशाळा
इचलकरंजी
राज्य शासनाच्या सांस्कृतिक कार्य संचालनालयामार्फत इचलकरंजी येथे वस्त्र संस्कृती विषयक दोन दिवसीय कार्यशाळेचे आयोजन करण्यात आलेले आहे. महाराष्ट्राची पारंपारिक वस्त्र संस्कृती, वस्त्र संस्कृतीमध्ये होत असणारे बदल, वस्त्र संस्कृतीचे महत्त्व आणि वस्त्र संस्कृतीचे जतन संवर्धन यावर विविध मान्यवरांची व्याख्याने, चर्चासत्र आणि कार्यशाळा याचे आयोजन करण्यात आलेले आहे. सांस्कृतिक कार्यमंत्री अँड. आशिष शेलार यांच्या मार्गदर्शनाखाली या दोन दिवसीय कार्यशाळेचे आयोजन करण्यात आलेले आहे. सांस्कृतिक कार्य विभागाचे अपर मुख्य सचिव तथा मुख्यमंत्री कार्यालयाचे अपर मुख्य सचिव विकास खारगे यांच्या संकल्पनेतून ही कार्यशाळा संपन्न होत असल्याची माहिती, सांस्कृतिक कार्य संचालनालयाचे संचालक विभीषण चवरे यांनी दिली आहे.
दिनांक २२ मार्च रोजी सकाळी दहा वाजता या कार्यशाळेचे उद्घाटन होईल. या कार्यशाळेमध्ये अनेक मान्यवर वस्त्र संस्कृती विषयक व्याख्यान देणार आहेत. दिनांक 22 मार्च रोजी प्राचीन शैली वस्त्र वारसा यावर श्री विनय नारकर यांचे व्याख्यान होईल तसेच प्रोफे.डॉ. अश्विनी अनिल रायबागी यांचे भारतमाता व वस्त्रोद्योग यावर मार्गदर्शन होईल. श्रीमती भाग्यलक्ष्मी घारे हे कोकणातील काथ्या उद्योग यावर भाष्य करतील, तर श्री बाळकृष्ण कापसे हे पैठणी विणकाम आणि बदलते तंत्रज्ञान याविषयी आपले मार्गदर्शन करतील. श्रीमती केतकी शहा मुक्कीरवार यांचे खण वस्त्र परंपरा आणि त्यातील बदल यावर व्याख्यान आयोजित करण्यात येणार आहे.
दिनांक २३ मार्च रोजी. श्रीमती रसिका वाकलकर ह्या पैठणी काल आज आणि उद्या यावर मार्गदर्शन करतील तर इम्रान कुरेशी हिमरु वस्त्र शैली बाबत आपले व्याख्यान देतील. चित्रपट क्षेत्रातील वेशभूषाकार चैत्राली डोंगरे यांचे चित्रपटसृष्टीतील वस्त्रभूषा यावर व्याख्यान होईल तर प्राचार्य श्रीमती हिरेमठ या बदलती पिढी आणि फॅशन इन्स्टिट्यूट यावर आपले मत व्यक्त करतील, श्री प्रकाशअण्णा आवाडे, माजी वस्त्रोद्योग मंत्री यांचे वस्त्रोद्योग योजना मार्गदर्शन या विषयावर व्याख्यान होणार असून श्रीमती पौर्णिमा शिरीषकर हे वस्त्रोद्योगातील संधी यावर मार्गदर्शन करतील. या कार्यशाळेच्या अनुषंगाने दिनांक २२ मार्च रोजी सायंकाळी “गाणी वस्त्रांची” हा सांस्कृतिक कार्यक्रम जेष्ठ संगीतकार अजित परब आणि त्यांचा समूह सादर करणार आहेत. दिनांक २३ मार्च रोजी पारंपारिक वस्त्रांचा फॅशन शो याचे आयोजन करण्यात येणार आहे.
या कार्यशाळेत विद्यार्थी, अभ्यासक, पत्रकार व रसिक यांनी मोठ्या संख्येने उपस्थित राहावे असे आवाहन अपर मुख्य सचिव विकास खारगे यांनी केलेले आहे.
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
