डी के ए एस सी मध्ये मराठी नेट सेट कार्यशाळा संपन्न

 इचलकरंजी :

 येथील दत्ताजीराव कदम आर्ट्स, सायन्स अँड कॉमर्स कॉलेज, इचलकरंजी येथील मराठी विभागाच्या वतीने मराठी नेट सेट कार्यशाळा नुकतीच संपन्न झाली. महाविद्यालयाचे प्राचार्य डॉ. एस. एम. मनेर यांच्या हस्ते उद्घाटन झालेल्या या कार्यशाळेमध्ये सर्जेराव पद्माळकर हे प्रमुख पाहुणे होते.

          यावेळी बोलताना प्रा. डॉ. सर्जेराव पद्माळकर म्हणाले , “पदव्युत्तर शिक्षणानंतर प्राध्यापक होण्याचे स्वप्न बाळगून बरेच विद्यार्थी नेट सेट परीक्षेचा अभ्यास करत असतात. त्यांना या परीक्षांचे नेमके मार्गदर्शन व्हावे. यासाठी अशा कार्यशाळांचे आयोजन महत्त्वाचे असते. परीक्षेपूर्वीचा अभ्यास, त्याचे नियोजन याबरोबरच प्रत्यक्ष परीक्षा देत असताना वेळेचं नियोजन या सगळ्या गोष्टी नेट-सेट परीक्षांमध्ये महत्त्वाच्या आहेत. सातत्यपूर्ण अभ्यास आणि प्रश्नपत्रिकांचा सराव केल्याने या परीक्षेत यश मिळवणे सोपे होते.” अशा पद्धतीचे मार्गदर्शन करत आज वरील परीक्षांच्या प्रश्नपत्रिका व एकूण मराठी नेट सेटचा अभ्यासक्रम यावर सविस्तर चर्चा केली. अध्यक्षीय मनोगतात प्राचार्य डॉ. मणेर म्हणाले, ” पदवी आणि पदव्युतर शिक्षण घेत असताना करिअरचा विचार विद्यार्थ्यांच्या मनात असणे गरजेचे आहे.  कार्यशाळांच्या माध्यमातून मुलांचे स्वप्नपूर्तीसाठी एक नवीन वाट निर्माण होते.”

कार्यक्रमाचे प्रास्ताविक व पाहुण्यांचा परिचय मराठी विभाग प्रमुख प्रो. डॉ. सुभाष जाधव यांनी करून दिला तर आभार श्री. रोहित शिंगे यांनी मानले. श्रीमती. भारती कोळेकर यांनी सूत्रसंचालन केले. यावेळी गुरूदेव कार्यकर्ते, पदवी व पदव्युत्तर मराठी विभागातील विद्यार्थी, माजी विद्यार्थी  मोठ्या संख्येने उपस्थित होते.