डॉ.बाबासाहेब आंबेडकर श्रम साफल्य आवास योजनेचा प्रस्ताव येत्या १५ दिवसांत शासनाकडे पाठवणार-आयुक्त पल्लवी पाटील

इचलकरंजी:

  इचलकरंजी महानगरपालिकेच्या वतीने डॉ बाबासाहेब आंबेडकर श्रम साफल्य आवास योजनेंतर्गत सफाई कर्मचाऱ्यांचे विशिष्ट प्रकारचे काम विचारात घेऊन ज्या सफाई कर्मचाऱ्यांची सेवा २५ वर्षे किंवा त्यापेक्षा जास्त झालेली आहे अशा सफाई कर्मचाऱ्यांना डॉ. बाबासाहेब आंबेडकर श्रम साफल्य आवास योजनेंतर्गत मालकी तत्त्वावर मोफत सदनिका देणे बाबतचा शासन निर्णय झालेला आहे. या अनुषंगाने  इचलकरंजी शहराचे आमदार डॉ. राहुल आवाडे यांनी इचलकरंजी महानगरपालिका प्रशासन आणि कर्मचारी संघटना प्रतिनिधी यांचे समवेत बैठकीचे आयोजन करणेच्या सुचना आयुक्त तथा प्रशासक पल्लवी पाटील यांना दिलेल्या होत्या. या सुचनेनुसार आमदार डॉ.राहुल आवाडे, आयुक्त तथा प्रशासक पल्लवी पाटील, अतिरिक्त आयुक्त सुषमा शिंदे, उपायुक्त नंदु परळकर, उपायुक्त अशोक कुंभार यांच्या प्रमुख उपस्थितीत आज शुक्रवार दि.११ एप्रिल रोजी महानगर पालिका सभागृहात बैठकीचे आयोजन करणेत आलेले होते.

     या बैठकीत या योजनेच्या अनुषंगाने सविस्तर चर्चा आणि विचार विनिमय करून या योजनेअंतर्गत शहरातील भाग्यरेखा थिएटर समोरील कामगार चाळ या ठिकाणी घरकुले बांधनेचा निर्णय सर्वानुमते घेणेत आला.

              सदर ठिकाणी या योजनेअंतर्गत सद्यःस्थितीत सर्व सोयी सुविधांसह G + 3 मजले अशा स्वरूपाचा परंतु G + 7 मजले गृहीत धरून फौंडेशनची रचना करुन इमारत बांधकामाचा सविस्तर प्रकल्प अहवाल (DPR ) येत्या सात दिवसांत तयार करून येत्या पंधरा दिवसांत या योजनेचा प्रस्ताव शासनाकडे पाठविण्याचा निर्णय करणेत आलेला आहे.

या बैठकीस सहा आयुक्त विजय राजापुरे, माजी उपनगराध्यक्ष बाळासाहेब कलागते,माजी नगरसेवक श्रीनिवास कांबळे, कामगार नेते प्राचार्य ए.बी.पाटील,

शिवाजी जगताप, के.के.कांबळे, सुभाष मालपाणी, अविनाश कांबळे, धनंजय पळसुले, संजय शेटे, संजय कांबळे, रचना सहायक अविनाश बन्ने, अभियंता बाबासो भोरे, पिनाका कन्सल्टन्सीचे प्रतिनिधी यांचेसह लाभार्थी सफाई कर्मचारी उपस्थित होते.

   फोटो-  बैठकीप्रसंगी उपस्थित आ.राहुल आवाडे,आयुक्त पल्लवी पाटील,अति आयुक्त सुषमा शिंदे व इतर