पंचकल्याण महोत्सवात राज्याभिषेक सोहळा उत्साहात 

इचलकरंजी :

   येथे सुरू असलेल्या पंचकल्याण प्रतिष्ठा महोत्सवात चौथ्या दिवशी राज्याभिषेक सोहळा पार पडला. या निमित्ताने सभामंडपात भव्य राज दरबाराची प्रतिकृती करण्यात आली होती या ठिकाणी ५६ राजांकडून नजरांना अर्पण करण्यात आला.

 येथील दिगंबर जैन बोर्डिंग मध्ये असलेल्या मंदिराच्या पंचकल्याण प्रतिष्ठा महा महोत्सवाच्या निमित्ताने विविध कार्यक्रम सुरू आहेत. आज चौथ्या दिवशी सकाळी नित्यविधी आणि यजमानांचे हत्तीवरून मंदिरात आगमन झाले. त्यानंतर मंदिरात लघुशांतीक, विश्वशांती महायज्ञ असे धार्मिक विधी पार पडले सकाळी भव्य जलकुंभ मिरवणूक काढण्यात आली. हत्तीवरून जलकुंभ आणल्यानंतर मुख्य सभामंडपात पंचामृत अभिषेक चा कार्यक्रम व शांतीधारा मंत्र पार पडला.

 दुपारी भव्य राज्याभिषेक सोहळा झाला. यावेळी ५६ राजांकडून राज दरबारात भेट अर्पण करण्याचा कार्यक्रम पार पडला.  आचार्य श्रींचे प्रवचन ही झाले. संध्याकाळी पालखी आणि दीक्षा कल्याण संस्कार पार पडला. त्यानंतर महामांडलिक राजाची हत्तीवरून मिरवणूक काढण्यात आली. परिसरातून ही मिरवणूक मुख्य सभा मंडपात आल्यानंतर मंगल आरतीचा कार्यक्रम पार पडला. रात्री विविध सांस्कृतिक कार्यक्रम आणि संगीत आरतीचे आयोजन करण्यात आले होते.

 महोत्सवास आज विविध मान्यवरांनी भेटी दिल्या. त्यामध्ये उत्तम पाटील बोरगावकर, अरविंद मजलेकर, सागर चौगुले, आप्पासाहेब भगाटे, अभय करोले, मनोज पाटील बोरगाव, प्रा. डी ए पाटील गुंडाप्पा  रोजे, चंद्रकांत पाटील, भूपाल गिरमल, दादासाहेब पाटील चिंचवडकर, अरुण भबीरे, सुभाष मगदूम, प्रकाश दानोळे आदींचा समावेश होता.

—–

आज आवाडे दादांचा  सन्मान

धार्मिक, सामाजिक, शैक्षणिक, क्रिडा, संस्कृतिक राजकीय अशा विविध क्षेत्रात उल्लेखनीय योगदान देणारे माजी खासदार कल्लाप्पाण्णा आवाडे दादा यांचा सकल जैन समाजाच्या वतीने ‘संस्कार रत्न ‘ या पदवीने सन्मान करण्यात येणार आहे. हा सोहळा रविवार २० एप्रिल रोजी दुपारी विविध मान्यवरांच्या उपस्थितीत होणार आहे.