राज्यात वस्त्रोद्योग उत्कृष्टता केंद्र उभारणीसाठी निर्णायक पाऊल; उद्योग, कौशल्य व रोजगाराला चालना — अशोक स्वामी
इचलकरंजी :
महाराष्ट्र शासनाच्या सहकार, पणन व वस्त्रोद्योग विभागाच्या पुढाकारातून राज्यातील निवडक वस्त्रोद्योग क्लस्टरमध्ये वस्त्रोद्योग उत्कृष्टता केंद्र उभारण्याचा महत्त्वपूर्ण प्रस्ताव पुढे आला आहे. या पार्श्वभूमीवर ११ एप्रिल २०२६ रोजी सकाळी ११.३० वाजता इचलकरंजी पॉवरलूम असोसिएशन हॉल येथे महत्त्वपूर्ण बैठक आयोजित करण्यात आली आहे.
या बैठकीत वस्त्रोद्योग क्षेत्रातील कौशल्यातील तफावत कमी करणे, आधुनिक तंत्रज्ञानावर आधारित प्रशिक्षण उपलब्ध करून देणे आणि रोजगाराच्या संधी वाढविणे यावर सविस्तर चर्चा होणार आहे. राज्यातील वस्त्रोद्योग अधिक सक्षम व स्पर्धात्मक करण्यासाठी उत्कृष्टता केंद्राच्या माध्यमातून अत्याधुनिक यंत्रसामग्री, संशोधन सुविधा, प्रशिक्षण कार्यक्रम आणि उद्योगाभिमुख कौशल्य विकासावर विशेष भर दिला जाणार आहे.
या उपक्रमामुळे स्थानिक उद्योगांना प्रशिक्षित मनुष्यबळ उपलब्ध होऊन उत्पादनाची गुणवत्ता वाढण्यास मदत होईल. तसेच निर्यात क्षमतेत वाढ होऊन जागतिक बाजारपेठेत स्पर्धात्मकता मजबूत होण्यासही हातभार लागणार आहे.
सदर बैठकीस प्रादेशिक उपआयुक्त, वस्त्रोद्योग (सोलापूर), संचालक, व्यवसाय शिक्षण व प्रशिक्षण संचालनालय (मुंबई), महाराष्ट्र राज्य सहकारी वस्त्रोद्योग महासंघ (मुंबई), दि इचलकरंजी पॉवरलूम असोसिएशन, डी.के.टी.ई. इचलकरंजी, सोलापूर गारमेंट्स असोसिएशन, सोलापूर पॉवरलूम असोसिएशन तसेच दि इचलकरंजी पॉवरलूम विणकर सहकारी संस्था यांचे प्रतिनिधी उपस्थित राहणार आहेत. याशिवाय महाराष्ट्र राज्य वस्त्रोद्योग महासंघाचे अध्यक्षही उपस्थित राहण्याची शक्यता आहे.
इचलकरंजी ही राज्यातील प्रमुख वस्त्रोद्योग नगरी असल्याने येथे उत्कृष्टता केंद्र उभारल्यास उद्योग क्षेत्राला मोठा लाभ होणार आहे. नवीन तंत्रज्ञानाचा अवलंब, कुशल मनुष्यबळ निर्मिती, उत्पादन खर्चात बचत आणि जागतिक बाजारपेठेत स्पर्धात्मकता वाढविणे या दृष्टीने हा प्रकल्प अत्यंत महत्त्वाचा ठरणार आहे.
तज्ज्ञांच्या मते, या उपक्रमामुळे उद्योग, शैक्षणिक संस्था आणि शासन यांच्यात समन्वय वाढून संशोधन, नवकल्पना आणि कौशल्य विकासाला चालना मिळेल. परिणामी स्थानिक युवकांना रोजगाराच्या नव्या संधी उपलब्ध होऊन वस्त्रोद्योग क्षेत्राचा विकास अधिक वेगाने होण्याची अपेक्षा व्यक्त केली जात आहे.
