एमआरडीपी अंतर्गत इचलकरंजीच्या ४१९ कोटींच्या प्रकल्पास मान्यता,आ.राहुल आवाडे यांच्या पाठपुराव्याला यश

इचलकरंजी

  महाराष्ट्र प्रतिसादकक्षम विकास कार्यक्रम (एमआरडीपी) अंतर्गत इचलकरंजी महानगरपालिकेच्या ४१९ कोटी रुपयांच्या प्रकल्प प्रस्तावास राज्यस्तरीय तांत्रिक समितीने बुधवारी मान्यता दिली. या प्रकल्पामुळे शहरातील वारंवार उद्भवणाऱ्या पूरस्थितीवर कायमस्वरूपी उपाययोजना होण्यास मदत होणार असून पावसाळ्यातील पाणी निचरा व्यवस्था अधिक सक्षम होणार आहे.

इचलकरंजी शहरात पावसाळ्यात मोठ्या प्रमाणात पाणी साचते तसेच पंचगंगा नदीच्या पुरामुळे नागरी वस्त्यांमध्ये पाणी शिरून रस्ते व गटारींचे मोठे नुकसान होते. या पार्श्वभूमीवर महानगरपालिकेने आधुनिक स्ट्रॉम वॉटर ड्रेनेज व्यवस्था उभारणे, पूरनियंत्रण व पाण्याचा निचरा सुरळीत करण्यासाठी सविस्तर प्रकल्प अहवाल तयार केला होता.

या प्रकल्पात काळा ओढा व चंदूर ओढ्याचे रुंदीकरण, गाळ काढणे, बॉक्स कल्व्हर्ट उभारणे, रस्त्याकडील ड्रेनेज व्यवस्था विकसित करणे, रेनवॉटर हार्वेस्टिंग, डिटेन्शन पॉन्ड, कॉन्टूर ट्रेंचेस तसेच मियावाकी गार्डनसारख्या पर्यावरणपूरक उपाययोजनांचा समावेश आहे. जागतिक बँक व ‘मित्रा’ संस्थेच्या मार्गदर्शनाखाली तयार झालेल्या या प्रकल्पामुळे भविष्यात पूरस्थिती, पाणी साचणे व नाल्यांच्या समस्या मोठ्या प्रमाणात कमी होणार असल्याचा विश्वास आमदार आवाडे यांनी व्यक्त केला.