खर्चीवाल्या यंत्रमागधारकांच्या मजुरीवाढीचा प्रश्न अखेर निकाली ५२ पिकास २६ पैसे मजुरीवाढीवर करार; माजी आमदार सुरेशराव हाळवणकर यांच्या मध्यस्थीने तोडगा

इचलकरंजी:

 गेल्या महिनाभरापासून सुरू असलेल्या खर्चीवाल्या यंत्रमागधारकांच्या मजुरीवाढीच्या आंदोलनाला अखेर सोमवारी यश आले. यंत्रमागधारकांचे प्रतिनिधी आणि ट्रेडिंग असोसिएशन यांच्यात झालेल्या चर्चेनंतर ५२ पिकास २६ पैसे मजुरीवाढ देण्याचा निर्णय घेण्यात आला. माजी आमदार सुरेशराव हाळवणकर यांच्या मध्यस्थीमुळे हा तोडगा निघाल्याचे सांगण्यात आले.

गेल्या १३ वर्षांपासून खर्चीवाल्या यंत्रमागधारकांना मजुरीवाढ मिळालेली नव्हती. वाढती महागाई, उत्पादन खर्चातील वाढ आणि उद्योगातील आर्थिक अडचणी यामुळे यंत्रमाग व्यवसाय संकटात सापडला होता. या पार्श्वभूमीवर कोल्हापूर जिल्हा पावरलूम असोसिएशन, जागृती यंत्रमागधारक संघटना, शिवसेना प्रणित यंत्रमागधारक संघटना, खर्चीवाला यंत्रमागधारक संघटना तसेच साधे यंत्रमागधारक संघटना यांनी मजुरीवाढीसाठी आंदोलन छेडले होते.

या प्रश्नावर यापूर्वी प्रांत कार्यालयात दोन वेळा बैठका घेण्यात आल्या होत्या. मात्र त्यातून कोणताही ठोस निर्णय झाला नव्हता. दरम्यान, २३ मे रोजी झालेल्या बैठकीत माजी आमदार सुरेशराव हाळवणकर यांनी यंत्रमागधारकांना आंदोलन मागे घेण्याचे आवाहन करत ८ जूनपर्यंत तोडगा काढण्याचे आश्वासन दिले होते.

त्याअनुषंगाने सोमवारी सकाळी हाळवणकर यांच्या कार्यालयात दोन्ही बाजूंच्या प्रतिनिधींची बैठक झाली. या बैठकीत प्रचलित मजुरीमध्ये अर्धा पैसा वाढ करून ५२ पिकास २६ पैसे असा दर निश्चित करण्याचा निर्णय घेण्यात आला. त्यानंतर सर्व प्रतिनिधींनी प्रांत कार्यालयात जाऊन प्रांताधिकारी दीपक शिंदे यांच्यासमोर झालेल्या समझोत्याची माहिती दिली. दोन्ही बाजूंची भूमिका ऐकल्यानंतर अधिकृत करार करण्यात आला.

करारानुसार ही मजुरीवाढ पुढील तीन वर्षांसाठी लागू राहणार असून त्यानंतर नव्याने चर्चा करून करार अथवा पुढील वाढ निश्चित करण्यात येणार आहे.

बैठकीस यंत्रमागधारकांचे प्रतिनिधी पुंडलिकराव जाधव, विश्वनाथ मेटे, शहाजी भोसले, नंदकुमार लोखंडे, धर्मराज जाधव, रावसाहेब तिपे तसेच ट्रेडिंग असोसिएशनचे अध्यक्ष रामपाल भंडारी, चंदनमल मंत्री, ओमजी दरक, ओमप्रकाश काबरा आणि तुळशीराम खंडेलवाल उपस्थित होते.

दरम्यान, मजुरीवाढीच्या बैठकीची माहिती मिळताच अनेक यंत्रमागधारक व महिला कारखानदार प्रांत कार्यालयात मोठ्या संख्येने उपस्थित होते. आंदोलनाच्या पार्श्वभूमीवर आणि दोन दिवसांपूर्वी देण्यात आलेल्या आत्मदहनाच्या इशाऱ्यामुळे परिसरात पोलीस बंदोबस्तही ठेवण्यात आला होता.

प्रांत कार्यालयात बैठकीदरम्यान प्रांताधिकारी दिपक शिंदे,माजी आमदार सुरेशराव हाळवणकर, ट्रेडिंगधारक व यंत्रमागधारक प्रतिनिधी.