संस्कार शिकवण्याची नव्हे, आचरणातून घडवण्याची गोष्ट : प्रथमेश इंदुलकर

इचलकरंजी : डिजिटल युगात मुलांच्या वर्तनातील बदलांसाठी केवळ मुलांना दोष न देता संस्कारांचा विचार करणे गरजेचे आहे. संस्कार ही शिकवण्याची गोष्ट नसून पालकांच्या वागण्या-बोलण्यातून, आचरणातून आणि वाचनातून ते मुलांमध्ये रुजतात, असे प्रतिपादन युवा व्याख्याते व प्रवचनकार ह.भ.प. प्रथमेश इंदुलकर यांनी केले.

रोटरी क्लब ऑफ इचलकरंजी व प्रोबस क्लब यांच्या संयुक्त विद्यमाने आयोजित कार्यक्रमात ‘संस्कार’ या विषयावर ते बोलत होते. आपल्या पहाडी आवाजात त्यांनी छत्रपती शिवाजी महाराज तसेच देशाच्या स्वातंत्र्यासाठी जीवाची पर्वा न करता लढलेल्या क्रांतिकारकांचा जीवनप्रवास सांगत संस्कारांचे महत्त्व पटवून दिले.

आज डिजिटल युगात मुले भरकटत चालली आहेत; मात्र यामागे मुलांचा दोष नसून संस्कारांचा अभाव हे महत्त्वाचे कारण आहे, असे त्यांनी सांगितले. घर बांधताना देवघर नसले तरी चालेल; मात्र वृद्ध आई-वडिलांना समाधानाने जगता येईल, अशी स्वतंत्र खोली नक्की बांधा, असे आवाहनही त्यांनी केले.

कार्यक्रमाच्या प्रारंभी रोटरी क्लबचे अध्यक्ष पंकज कोठारी यांनी स्वागत व प्रास्ताविक केले. सचिव सुनील यळरूटे यांनी साप्ताहिक कार्याचा आढावा घेतला. प्रथमेश इंदुलकर यांचा परिचय विठ्ठलराव डाके यांनी करून दिला, तर रवींद्र सौंदत्तीकर यांनी आभार मानले.

यावेळी रोटरी व प्रोबस क्लबचे पदाधिकारी, सदस्य तसेच निमंत्रित मोठ्या संख्येने उपस्थित होते.

मनोगत व्यक्त करताना प्रथमेश इंदुलकर व्यासपीठावर प्रेसिडेंट पंकज कोठारी व पदाधिकारी