हर घर तिरंगा अभियानात इचलकरंजीकरांनी सहभागी व्हावे

इचलकरंजी : भारत सरकारच्या ‘हर घर तिरंगा २०२६’ अभियानांतर्गत ९ ते १७ ऑगस्टदरम्यान शहरातील नागरिक, खाजगी व शैक्षणिक संस्था तसेच विविध आस्थापनांनी आपल्या घरावर व परिसरात राष्ट्रध्वज फडकवून उत्स्फूर्त सहभाग घ्यावा, असे आवाहन महानगरपालिका आयुक्त पल्लवी पाटील यांनी केले आहे. राष्ट्रध्वज फडकविताना त्याचा सन्मान, प्रतिष्ठा व पावित्र्य अबाधित राखावे, तसेच भारतीय ध्वज संहितेतील नियमांचे पालन करावे, असे त्यांनी सांगितले. जुलै २०२२ मधील ध्वज संहितेतील सुधारणेनुसार नागरिकांना दिवसा तसेच रात्रीही राष्ट्रध्वज फडकविता येतो. राष्ट्रध्वज हा देशाच्या एकता, अखंडता व स्वाभिमानाचे प्रतीक असून, अभियानात मोठ्या संख्येने सहभागी होऊन राष्ट्रप्रेम व्यक्त करावे, असे आवाहन करण्यात आले.