कै. भाई नेरुरकर चषक खो-खो स्पर्धा पुरुष व किशोर गटात कोल्हापूर, महिलात धाराशिव आणि किशोरी गटात सांगली अजिंक्य

इचलकरंजी:
क्रीडा व युवक सेवा संचालनालय महाराष्ट्र राज्य पुणे, उपसंचालक क्रीडा व युवक सेवा कोल्हापूर विभाग कोल्हापूर, जिल्हा क्रीडा अधिकारी कार्यालय कोल्हापूर, कोल्हापूर खो-खो असोसिएशन यांच्या संयुक्त विद्यमाने आयोजित कै. भाई नेरुरकर चषक खो-खो स्पर्धेत पुरुष गटात कोल्हापूर, महिला गटात धाराशिव, किशोर गटात कोल्हापूर आणि किशोरी गटात सांगली या संघांनी अजिंक्यपद पटविले. तर अनुक्रमे मुंबई उपनगर, पुणे, सांगली व पुणे हे संघ उपविजेते ठरले. विजेत्या संघांना उपमुख्यमंत्री अजितदादा पवार क्रीडा मंत्री दत्तात्रय भरणे आणि स्पर्धा समिती उपाध्यक्ष आमदार राहुल आवाडे

यांच्या हस्ते आणि मान्यवरांच्या उपस्थितीत पारितोषिके प्रदान करण्यात आली.
येथील विठ्ठल रामजी शिंदे प्रशालेच्या पटांगणावर सहकार महर्षि कल्लाप्पाण्णा आवाडे क्रीडानगरीत या स्पर्धेचे आयोजन करण्यात आले होते. चार दिवस सुरु असलेल्या या स्पर्धेत अनेक रंगतदार सामने होऊन क्रीडारसिकांना मेजवानी मिळाली. पुरुष गटात कोल्हापूर विरुद्ध मुंबई उपनगर, महिला गटात धाराशिव विरुध्द पुणे, किशोर गटात कोल्हापूर विरुद्ध सांगली तर किशोरी गटात सांगली विरुद्ध पुणे जिल्हा यांच्यात टक्करीची लढत झाली. पारितोषिक वितरणप्रसंगी माजी खासदार कल्लाप्पाण्णा आवाडे, माजी मंत्री प्रकाश आवाडे, आमदार डॉ. राजेंद्र पाटील यड्रावकर, आमदार शिवाजी पाटील, आमदार अशोकराव माने, क्रीडा व युवक सेवा कोल्हापूर विभाग आयुक्त हिरालाल सोनवणे, उपसंचालक माणिक पाटील, जिल्हा क्रीडा अधिकारी निलिमा अडसुळ, क्रीडा अधिकारी अरुण पाटील, आयुक्त पल्लवी पाटील, उपायुक्त सुषमा शिंदे, कोल्हापूर जिल्हा खो-खो असोशिएशनचे अध्यक्ष राजन उरुणकर, सुनिल पाटील, शेखर शहा,  विठ्ठल चोपडे आदी उपस्थित होते. स्पर्धेच्या निमित्ताने सहभागी 40 संघातील प्रत्येक खेळाडू आणि संघ व्यवस्थापक त्याचबरोबर पंचांना आमदार राहुल आवाडे यांच्या वतीने स्मार्ट वॉच गिफ्ट देण्यात आले. प्रारंभी जिल्हाधिकारी अमोल येडगे यांनी स्वागत व प्रास्ताविक केले.

पुरुष गटात नाणेफेक जिंकून मुंबई उपनगरने संरक्षण घेतले. पण कोल्हापूरच्या खेळाडूंनी आक्रमण करत पहिल्या डावात 9 गडी बाद केले. प्रत्युतरादाखल खेळताना मुंबई संघानेही जोरदार आक्रमण करताना  11 गुण मिळवत मध्यंतरापर्यंत 2 गुणांची आघाडी घेतली. तिसऱ्या पळतीत कोल्हापूर संघाला मुंबईच्या खेळाडूंनी चांगले झुंजवले. या डावात कोल्हापूर संघाने 9 गडी टिपले. विजयासाठी मुंबईला 8 गुणांची आवश्यकता असताना कोल्हापूरच्या भक्कम संरक्षणामुळे केवळ 7 गडी बाद करता आल्याने सामना बरोबरीत राहिला. त्यामुळे पुन्हा 9 मिनिटांचा वेळ देण्यात आला. त्यामध्ये प्रथमता  कोल्हापूरने दमदार आक्रमण करत 12 गुण मिळवले. मुंबईला विजयासाठी 13 गुणांची गरज असताना कोल्हापूरच्या खेळाडूंसमोर मुंबईचे शर्थीचे प्रयत्न तोकडे पडल्याने 11 गुण मिळाले आणि कोल्हापूरने अवघ्या 1 गुणाने सामना जिंकत अजिंक्यपदावर नाव कोरले