आपटे वाचन मंदिरातर्फे उत्कृष्ट साहित्यकृती पुरस्कारासाठी आवाहन

इचलकरंजी:

शतकोत्तर सुवर्णमहोत्सवी आपटे बाचन मंदिराच्यावतीने दरवर्षी त्या त्या वर्षातील उत्कृष्ट काव्यसंग्रहास दिल्या जाणा‌ऱ्या इंदिरा संत उत्कृष्ट काव्यसंग्रह पुरस्कारासाठी तसेच लक्षणीय काव्यसंग्रह पुरस्कारासाठी प्रकाशक व कवींना त्यांचे काव्यसंग्रह पाठविण्यासाठी आवाहन करण्यात आले आहे. तसेच इचलकरंजी साहित्य संमेलन स्मृती ट्रस्टच्या वतीने उत्कृष्ट गद्य व लक्षणीय गद्य पुरस्कारासाठी गद्य साहित्यकृती पाठविण्याचे आवाहन करण्यात आले आहे. इंदिरा संत उत्कृष्ट काव्यसंग्रह व उत्कृष्ट गदय पुरस्कारासाठी रु.१००००/- व गौरवपत्र असे पुरस्काराचे स्वरुप आहे. तसेच उत्कृष्ट पदय साहित्यकृतीमधील दोन लक्षणीय काव्यसंग्रह वसंतराव दातार व सुलभा मगदूम यांच्या नावे दोन लक्षणीय काव्यसंग्रहांना जाणार आहे. प्रत्येकी रु. ४०००/- व गौरवपत्र असे पुरस्काराचे स्वरुपं आहे. गदय साहित्यकृतीमधील दोन लक्षणीय गदय साहित्यकृतींना. रु. ४०००/- व गौरवपत्र असे लक्षणीय पुरस्काराचे स्वरुप आहे. याशिवाय ग्रंथालयातर्फे उत्कृष्ट कथासंग्रहास सौ. आशाताई सौंदत्तीकर यांच्या नावे उत्कृष्ट कथासंग्रह पुरस्कार जाणार आहे. रुपये १००००/- व गौरवपत्र असे या पुरस्काराचे स्वरुप आहे. तसेच कादंबरीसाठी विनायकराव श्रीपाद देशपांडे यांच्या नावे उत्कृष्ट कादंबरी पुरस्कार दिला जाणार आहे. रु. १००००/- व गौरवपत्र असे पुरस्काराचे स्वरुप आहे. भारतीय लेखकांच्या अन्यभाषेतील साहित्याचा मराठी भाषेतील अनुवादित साहित्यकृतीसाठी महादेव बाळकृष्ण जाधव यांच्या नावे उत्कृष्ट अनुवादित पुरस्कार दिला जाणार आहे. रु. १००००/- व गौरवपत्र असे पुरस्काराचे स्वरुप आहे. तसेच ललितगद्य साहित्यकृतीसाठी सौ. वसुंधरा मुकुंद अर्जुनवाडकर यांच्या नावे उत्कृष्ट ललित गद्य साहित्यकृती पुरस्कार दिला जाणार आहे. रु. १००००/- व गौरवपत्र असे पुरस्काराचे स्वरुप आहे, उत्कृष्ट बालसाहित्यासाठी पार्वती शंकरराव तेलसिंगे यांच्या नावे रु. ६०००/- व गौरवपत्र असे पुरस्काराचे स्वरुप आहे. तसेच रागिणी दादासो जगदाळे यांच्या स्मरणार्थ युवा पद्मरत्न पुरस्कारासाठी रु.५०००/- व गौरवपत्र असे स्वरुप आहे. (या पुरस्कारासाठी वय ३० वर्षाच्या आतील असावे सोबत पॅनकार्ड आवश्यक आहे.)

१ जानेवारी २०२५ ते ३१ डिसेंबर २०२५ या कालावधीमध्ये प्रसिध्द केलेल्या मराठी साहित्यकृतींचा (प्रथम आवृत्ती) या पुरस्कारासाठी विचार केला जाणार आहे. लेखक/कवी अथवा प्रकाशकाने आपल्या साहित्यकृतींच्या दोन प्रती कार्यवाह, आपटे वाचन मंदिर, ३/५६९, राजवाडा चौक, इचलकरंजी, जि. कोल्हापूर या पत्त्यावर दि. २० फेब्रुवारी २०२६ अखेर पर्यंत पाठवाव्यात असे आवाहन आपटे वाचन मंदिराचे अध्यक्ष सौ. सुषमा दातार व इचलकरंजी साहित्य संमेलन स्मृती ट्रस्टचे सचिव डॉ.श्रीवल्लभ मर्दा यांनी केले आहे.