दुर्गराज रायगडावर ५ व ६ जूनला भव्य शिवराज्याभिषेक सोहळा ५ ते ७ लाख शिवभक्तांच्या उपस्थितीची शक्यता; इचलकरंजीत ४ जूनला मानाच्या ध्वजाचे पुजन

इचलकरंजी:

छत्रपती शिवाजी महाराजांच्या ६ जून १६७४ रोजी झालेल्या ऐतिहासिक राज्याभिषेकाच्या स्मृती जागृत ठेवण्यासाठी दरवर्षी दुर्गराज रायगडावर साजरा होणारा शिवराज्याभिषेक सोहळा यंदा ५ व ६ जून रोजी मोठ्या उत्साहात पार पडणार आहे. अखिल भारतीय शिवराज्याभिषेक महोत्सव समितीच्या वतीने आयोजित या लोकोत्सवात देशभरातील लाखो शिवभक्त सहभागी होणार असून, यंदा ५ ते ७ लाख शिवभक्त उपस्थित राहण्याचा अंदाज व्यक्त करण्यात आला आहे. याबाबतची माहिती सचिन वरपे व प्रकाश मोरबाळे यांनी पत्रकार परिषदेत दिली.

समितीचे मार्गदर्शक युवराज संभाजी छत्रपती महाराज आणि युवराजकुमार शहाजीराजे छत्रपती यांच्या प्रमुख उपस्थितीत हा सोहळा होणार आहे. “धार तलवारीची, युद्धकला महाराष्ट्राची”, “जागर शिवशाहिरांचा” आणि “सोहळा पालखीचा, स्वराज्याच्या ऐक्याचा” ही यंदाच्या सोहळ्याची प्रमुख आकर्षणे असणार आहेत.

५ जून रोजी पाचाड येथील राजमाता जिजाऊंच्या समाधीस अभिवादन करून सोहळ्याला प्रारंभ होईल. त्यानंतर नाणे दरवाजा येथे स्वागत, गडपूजन, युद्धकलेची प्रात्यक्षिके, डोलवादन, लेझीम, शाहिरी कार्यक्रम, शिरकाई देवीचा गोंधळ तसेच कीर्तन-भजनाचे कार्यक्रम होणार आहेत.

मुख्य सोहळा ६ जून रोजी पार पडणार असून ध्वजपूजन, ध्वजारोहण, शाहिरी कार्यक्रम, शिवछत्रपती महाराजांच्या पालखीचे आगमन, उत्सवमूर्ती व सिंहासनावरील मूर्तीचा अभिषेक आणि युवराज संभाजी छत्रपती महाराजांचे शिवभक्तांना मार्गदर्शन हे कार्यक्रम होणार आहेत. त्यानंतर भव्य पालखी सोहळा जगदीश्वर मंदिराकडे प्रस्थान करेल. वारकरी संप्रदायाला मानाचा ध्वज प्रदान केल्यानंतर शिवरायांच्या समाधीस अभिवादन करून सोहळ्याची सांगता होईल.

शिवभक्तांच्या सोयीसाठी सुसज्ज पार्किंग व्यवस्था तसेच पाच ठिकाणी महाप्रसादाची व्यवस्था करण्यात आली आहे. पत्रकार परिषदेला इचलकरंजी गिरिभ्रमण संघटनेचे सचिन वरपे, प्रकाश मोरबाळे, नगरसेवक योगेश पाटील, किरण कोठावळे, राजेंद्र ढपाले आणि संजय हजारे उपस्थित होते. विशेष म्हणजे रायगड येथील मुख्य समितीत सचिन वरपे आणि प्रकाश मोरबाळे यांचा समावेश करण्यात आला आहे. इचलकरंजी व परिसरातून दरवर्षी सुमारे ५ हजार शिवभक्त या ऐतिहासिक सोहळ्यासाठी रायगडावर उपस्थित राहतात.