कलानगर महागणपती येथे “गजमहल” साकारणार – भव्य कलाकृतीकडे भाविकांचे लक्ष

इचलकरंजी :

 कलानगर महागणपती मंडळाचा ४८ वा गणेशोत्सव यावर्षी भव्यदिव्य कलाकृतीने सजणार आहे. मंडळाने यंदा “गजमहल” ही अनोखी संकल्पना उभारण्याचे ठरवले असून त्यासाठी तब्बल सहा हजार चौरस फुटांमध्ये ३५ फूट उंच देखावा उभारण्यात येत आहे.

या गजमहलामध्ये वीस बाय चाळीस फुटांचा जलकुंभ तयार केला असून त्यात राजहंस पक्षी सोडून नैसर्गिक दृश्य साकारले जाणार आहे. जमिनीपासून आठ फूट उंचीवर साकारलेल्या या कलाकृतीत १,००० हत्तींची मांडणी केली जाणार असून त्यामध्ये एका फूटापासून अडीच फूटापर्यंत उंचीचे हत्ती असतील. प्रवेशद्वारावर तब्बल साडेबारा फुटांचे दोन भव्य हत्ती भाविकांचे स्वागत करतील.

मंडळाने २०२० पासून यांत्रिक देखाव्यांना फाटा देत ध्वनी व प्रदूषणमुक्त गणेशोत्सव साजरा करण्याची परंपरा कायम ठेवली आहे. या कलाकृतीसाठी गेली तीन महिने जवळपास २०० कार्यकर्ते अथक परिश्रम घेत असून दररोज ३० कार्यकर्त्यांचे योगदान आहे

या सर्व कार्यक्रमांच्या यशस्वी आयोजनासाठी मंडळाचे अध्यक्ष सचिन तोडकर यांच्या नेतृत्वाखाली प्रभागातील शेकडो कार्यकर्ते काम करत आहेत. सुनील तोडकर,रमाकांत वाळवेकर,प्रशांत सपाटे यांचे मार्गदर्शनाने अभिषेक वाळवेकर, रोहन सपाटे, पंकज डंबाळ यांनी देखाव्याच्या कलाकृती व नियोजनात विशेष परिश्रम घेतले आहेत.

 मुस्ताक पैलवान,चंद्रकांत सपाटे,उदय म्हेतर,समीर तारळेकर,रोहित तोडकर,तुषार म्हेतर यांच्यासह मंडळातील जवळपास २०० कार्यकर्त्यांनी गेल्या तीन महिन्यांपासून दिवस-रात्र श्रम देऊन गजमहल उभारला आहे.

या सर्व कार्यक्रमांची तयारी मोठ्या दिमाखात सुरू असून भाविकांसाठी दररोज धार्मिक वातावरणात विविध उपक्रम होणार आहेत. मंडळाचे पदाधिकारी व कार्यकर्त्यांनी सांगली,सातारा,कोल्हापूर, कर्नाटकात याबाबत प्रसिद्धी केली असून भाविकांनी उत्सवामध्ये सहभागी होऊन महागणपतीचे आशीर्वाद घेण्याचे आवाहन मंडळाच्या वतीने करण्यात आले आहे.

लाखो भाविक गणेशोत्सवात दर्शनासाठी व कलाकृती पाहण्यासाठी भेट देत असतात त्यामुळे त्यामुळे महापालिका व पोलीस प्रशासनाने सहकार्य करावे असे आवाहन सुनील तोडकर यांनी केले