शिवसेना शिंदे गटाकडून उमेदवारी अर्ज वाटपाला आजपासून सुरुवात

इचलकरंजी:

इचलकरंजी महानगरपालिका सार्वत्रिक निवडणुकीच्या तयारीला वेग आला असून शिवसेना शिंदे गटाकडून इच्छुक उमेदवारांचे अर्ज गुरुवार, ११ डिसेंबरपासून वाटप करण्यात येणार असल्याची माहिती जिल्हाप्रमुख रवींद्र माने,शहर प्रमुख भाऊसाहेब आवळे,ज्येष्ठ नेते महादेव गौड यांनी दिली. आगामी निवडणुकीत प्रत्येक प्रभागातून अनेक इच्छुक उमेदवार पुढे येत असून प्रभागनिहाय आरक्षणानुसार उमेदवारी अर्ज झेंडा चौक येथील मातोश्री कार्यालयात उपलब्ध राहणार आहेत. हे अर्ज बुधवार १७ डिसेंबरपर्यंत स्वीकारले जाणार असल्याचेही त्यांनी सांगितले.

शिवसेनेचे मुख्य नेते व उपमुख्यमंत्री एकनाथ शिंदे यांच्या कार्यपद्धतीचा वेग, जनहिताचा ठाम दृष्टिकोन आणि ‘लाडकी बहीण’ योजनेचा पोहचलेला लाभ यामुळे पक्ष तळागाळात अधिक बळकट झाल्याचे माने यांनी नमूद केले. वाढलेला जनसंपर्क, कार्यकर्त्यांची तयारी आणि मतदारांचा सकारात्मक प्रतिसाद पाहता उमेदवारांमध्ये निवडणूक लढवण्यासाठी उत्साहाचे वातावरण निर्माण झाले आहे.

इच्छुकांनी विहित नमुन्यातील आरक्षण निहाय मागणी अर्ज पूर्ण कागदपत्रांसह वेळेत भरून जमा करावेत, असे आवाहनही जिल्हाप्रमुख माने यांनी केले असून, निवडणूक प्रक्रियेला शिस्तबद्ध आणि पारदर्शक रूप देण्याचा निर्धार शिंदे गटाने व्यक्त केला आहे.