इचलकरंजीत बारसमोर कोयत्याने हल्ला; पाच जणांविरुद्ध गुन्हा दाखल

इचलकरंजी:

इचलकरंजीतील योगायोग नगर येथील आर. के. बारसमोर झालेल्या वादातून कोयत्याने हल्ला केल्याची गंभीर घटना घडली आहे. याप्रकरणी शिवाजीनगर पोलीस ठाण्यात पाच जणांविरुद्ध गुन्हा दाखल करण्यात आला आहे.

फिर्यादी अक्षय संजय गायकवाड (वय ३०, रा. चंदूर) यांनी दिलेल्या माहितीनुसार, दि. २७ जानेवारी २०२६ रोजी रात्री ११ वाजण्याच्या सुमारास त्यांचा मित्र शिवा दोडमणी व आरोपी प्रविण नाईक यांच्यात वाद सुरू होता. वाद सोडविताना फिर्यादीने मित्राची बाजू घेतल्याचा राग मनात धरून प्रविण नाईक याने आपल्या साथीदारांना घटनास्थळी बोलावले.

यानंतर आरोपी ओंकार शंकर गोरनाळे याने कोयत्याने फिर्यादीच्या डोक्यावर वार केला, तर शशि मोरे याने कोयत्याने सचिन जळणे यांच्या डोक्यावर हल्ला करून त्यांना जखमी केले. इतर आरोपींनी लाथाबुक्क्यांनी मारहाण करून शिवीगाळ व जीवे मारण्याची धमकी दिली.

या प्रकरणी गुन्हा दाखल झाला आहे. पुढील तपास पोलीस हवालदार मुल्लाणी करत आहेत.