घरफाळा व पाणीपट्टी थकबाकी त्वरित भरून जप्ती टाळण्याचे आयुक्तांचे आवाहन

इचलकरंजी:

इचलकरंजी महानगरपालिकेच्या कर मूल्यनिर्धारण व संकलन विभागामार्फत सन २०२५-२६ या आर्थिक वर्षासाठी घरफाळा व पाणीपट्टीची देयके शहरातील नागरिकांना वितरित करण्यात आली आहेत. मात्र अद्यापही अनेक मिळकतधारकांनी आपला घरफाळा व पाणीपट्टी भरणा केलेला नसल्याचे निदर्शनास आले आहे.

त्यामुळे संबंधित मिळकतधारकांनी आपली थकबाकी त्वरित भरावी, असे आवाहन इचलकरंजी महानगरपालिकेच्या वतीने करण्यात आले आहे. कर भरण्यासाठी महानगरपालिका मुख्य कार्यालयासह शहरातील चारही विभागीय कार्यालये कार्यालयीन वेळेत सकाळी ९.४५ ते सायंकाळी ५.०० वाजेपर्यंत खुली राहणार आहेत. तसेच शनिवारी, कार्यालयीन सुट्टीच्या दिवशीही कार्यालय सुरू राहणार असल्याची माहिती देण्यात आली आहे.

वेळीच कर भरणा करून जप्तीसारखा कटू प्रसंग टाळावा व महानगरपालिकेस सहकार्य करावे, असे आवाहन मा. आयुक्त तथा प्रशासक पल्लवी पाटील यांनी केले आहे.