जन्मशताब्दी आणि  सुवर्ण महोत्सवही विविध उपक्रमानी साहाय्याने साजरा होणार…समाजवादी प्रबोधिनीच्या बैठकीतील निर्णय

संविधानाचे नामवंत अभ्यासक ज्येष्ठ विचारवंत  प्रा. डॉ. भालबा विभूते यांनी यावेळी ” समाजवादी प्रबोधिनीच्या सुवर्ण महोत्सवा निमित्ताने एक संवाद ” या आशयाची अभ्यासपूर्ण मांडणी केली. त्यामध्ये मूलभूत तात्विक अधिष्ठान, लक्ष्यकेंद्रित पद्धतीने कार्य,  संघटन ,सुवर्ण महोत्सवी वर्षातील उपक्रम ,त्याचे नियोजन, निधी संकलनाचे मार्ग,प्रबोधन प्रकाशन ज्योती व प्रबोधन वाचनालय या उपक्रमांची व्यापकता, प्रबोधिनीच्या शाखांचे मजबुतीकरण,पंचवार्षिक नियोजन आदी मुद्द्यांच्या आधारे ही मांडणी केली. त्यावर सर्व सहभागी मंडळींनी सखोल स्वरूपाची चर्चाही केली.

अध्यक्षस्थानावरून बोलतांना प्रा .डॉ.अशोक चौसाळकर म्हणाले, आचार्य शांताराम बापूंची जन्मशताब्दी सुरू झाली आहे.तसेच ११ मे २०२६ पासून “शास्त्रीय समाजवादाचे खुले ज्ञानपीठ ” हे ब्रीद घेऊन महाराष्ट्राच्या प्रबोधन चळवळीत सातत्यपूर्ण संस्थात्मक स्वरूपाचे काम करणारी ” समाजवादी प्रबोधिनी ” ही संस्था ५० व्या वर्षात पदार्पण करत आहे. समाजवादी प्रबोधिनीच्या सुवर्ण महोत्सवी वर्षामध्ये ती सर्वार्थाने अधिक सक्षम व्हावी यासाठी आपण सर्वांनी व्यक्तिगत आणि सामूहिक पातळीवर आगामी सव्वा वर्ष जोमाने प्रयत्न करण्याची नितांत गरज आहे. तसे प्रयत्न आपण सर्वजण मिळून करूया. या प्रयत्नांना समाजातील सर्व घटकांनी सहकार्य करावे असे आवाहनही केले. यावेळी प्रा.संजय साठे, प्रा. शिवाजीराव होडगे, प्रा. शांताराम कांबळे, के.एस. दानवाडे, एफ.वाय.कुंभोजकर, समीर कटके, ॲड.संभाजीराव जाधव ,वाय.एम. चव्हाण ,उज्वला दळवी, उर्मिला कदम, सौदामिनी कुलकर्णी,प्राचार्य साताप्पा कांबळे, पांडुरंग पिसे, देवदत्त कुंभार ,शकील नदाफ ,तुकाराम अपराध, राजन मुठाणे, शिवाजी शिंदे, धुळगोंडा पाटील, बाळासाहेब कदम, नौशाद शेडबाळे, कविता डांगरे, मानसी तगारे यांच्यासह प्रबोधिनीच्या विविध शाखांचे प्रमुख कार्यकर्ते उपस्थित होते.