फेरीवाल्यांच्या गैरहजेरीत गटारीवरील अतिक्रमण निर्मूलन; इचलकरंजीत अतिक्रमण मोहीम पार
इचलकरंजी:
शहरातील मुख्य रस्त्यांवरील अतिक्रमण हटवण्यासाठी जाहीर करण्यात आलेली मोहीम आज पार पडली. फेरीवाले मोठ्या प्रमाणात गैरहजर राहिल्याने मनपाने व्यापाऱ्यांच्या अतिक्रमणांवरच जेसीबीचा बडगा चालवत मोहीम राबवली.
महापौर उदय धातुंडे व उपमहापौर अनिल डाळ्या यांनी फेरीवाल्यांचे अतिक्रमण हटवण्याचे आदेश दिले होते. मात्र सुमारे साडेआठशे फेरीवाले शहरात न आल्याने “अतिक्रमण काढायचे कोणाचे?” असा प्रश्न उपस्थित झाला होता.
दरम्यान, झेंडा चौक व कोर्ट परिसरातून मोहिमेला सुरुवात करण्यात आली. रस्त्याकडेला गटारीबाहेर झालेली अतिक्रमणे, गटारीवरील बांधकामे तसेच पानटपऱ्यांची खोकी हटवण्यात आली. यशवंत प्रोसेस व सोन्या मारुती मंदिर परिसरात काही दुकानदारांनी केलेले पाच ते दहा फूट अतिक्रमण जेसीबीच्या साह्याने काढण्यात आले.
कारवाईदरम्यान काही ठिकाणी वादावादी झाली असून सुमारे ९ ते १० लाखांचे नुकसान झाल्याचा दावा संबंधितांकडून करण्यात आला. काहींनी नगरसेवकांना संपर्क करण्याचा प्रयत्न केला, मात्र प्रतिसाद न मिळाल्याने संताप व्यक्त करण्यात आला.
दरम्यान, शुक्रवारी व मंगळवारी भरणारा आठवडा बाजार आणि रस्त्याकडील भाजी विक्रेते आज पूर्णपणे गायब होते. सुमारे ८५० हून अधिक फेरीवाल्यांनी मनपाला चकवा दिल्याची चर्चा रंगली. या मोहिमेत नगरसेवक व फेरीवाल्यांचे नेते अनुपस्थित राहिल्याने सामान्य कर्मचाऱ्यांनाच संपूर्ण जबाबदारी पार पाडावी लागली.
अतिक्रमण निर्मूलन मोहीमेवेळीचे छायाचित्र
