पगार वाटपाचे कारण सांगून १.३५ लाख रुपये लंपास; दोघांविरुद्ध गुन्हा
इचलकरंजी, दि. १९ : कामगारांचा पगार वाटपासाठी मालकांनी पैसे मागितल्याचे सांगून विश्वास संपादन करत १ लाख ३५ हजार रुपयांची फसवणूक केल्याप्रकरणी शिवाजीनगर पोलिसांनी दोघांविरुद्ध गुन्हा दाखल केला आहे.
याप्रकरणी सौ. लता संजय माने (रा. बापू मासाळ गल्ली, जवाहरनगर, इचलकरंजी) यांनी फिर्याद दिली आहे. त्यानुसार आरिफ कादरी व फजल आरिफ कादरी (दोघे रा. साई मंदिराजवळ, कबनूर, ता. हातकणंगले) यांच्याविरुद्ध फसवणूक व धमकी दिल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी हे फिर्यादी यांच्या कारखान्यात काम करत होते. त्यांनी यापूर्वी कौटुंबिक गरजेसाठी दोन लाख रुपये उसने मागितले होते. १२ जून रोजी फिर्यादी घरी असताना आरोपींनी “कामगारांचा पगार वाटण्यासाठी मालकांनी घरात ठेवलेले पैसे मागितले आहेत,” असे सांगून विश्वासाने १ लाख ३५ हजार रुपये घेतले. मात्र, पैसे घेऊन तेथून निघून गेले.
त्यानंतर फिर्यादीच्या पतीने पैसे परत मागितले असता आरोपींनी पैसे घेतल्याचे नाकारले. तसेच पैशांसाठी तगादा लावल्यास फिर्यादी व त्यांच्या कुटुंबाला गंभीर परिणाम भोगावे लागतील, अशी धमकी दिल्याचा आरोप फिर्यादीत करण्यात आला आहे.
या प्रकरणाचा पुढील तपास शिवाजीनगर पोलीस करीत आहेत.
