सुळकुड योजना रद्द झालेली नाही,इचलकरंजीच्या पाणीपुरवठ्यासाठी शासनस्तरावर मोठा निधी उपलब्ध-आ.राहुल आवाडे

इचलकरंजी

इचलकरंजी शहरातील पाणीपुरवठा व्यवस्था बळकट करण्यासाठी विविध योजनांअंतर्गत मोठ्या प्रमाणात निधी मंजूर झाला असून, लवकरच यासंबंधीच्या महत्त्वाच्या कामांना सुरुवात होणार आहे. अशी माहिती आमदार राहुल आवाडे यांनी पत्रकार परिषदेत दिली. या वेळी मा.आ. सुरेश हाळवणकर यांनी प्रशासनाच्या कामावर समाधानी नसून इचलकरंजी शहराच्या पाणीयोजनेस विरोध करण्याची सुरू झालेली फॅशन प्रशासनाने कडक पावले उचलून मोडून काढण्याची आवश्यकता असल्याचे मत व्यक्त केले.

यावेळी बोलताना राहुल आवाडे यांनी पंचगंगा जॅकवेल परिसरातील पाणी उपसा क्षमता वाढविण्यासाठी जिल्हा वार्षिक योजना २०२४-२५ अंतर्गत नागरी दलितेतर सुधार योजनेतून ३०० अश्वशक्तीच्या पंपाचे बसविणे, ८०० के.व्ही.ए. ट्रान्सफॉर्मर बसविणे आणि जलशुद्धीकरण केंद्रात १२५० के.व्ही.ए. क्षमतेचा ट्रान्सफॉर्मर बसविण्यात येणार आहे. यासाठी ४.३९ कोटी रुपये मंजूर झाले असून, यामुळे शहराच्या पाणी उपसा क्षमतेत मोठी वाढ होणार आहे. कट्टीमोळा जॅकवेल परिसरातील विद्युत वाहिनी नव्याने टाकणे, VFD स्टार्टर बसविणे आणि सुरक्षेसाठी CCTV लावणे या कामांसाठी ३६ लाख रुपयांचा निधी मंजूर झाला आहे. या प्रकल्पामुळे दररोज ९ द.ल.लि. पाणी उपसा करणे शक्य होणार आहे.२०१९ च्या महापुरात झालेल्या नुकसानीनंतर विजपुरवठा सुरळीत करण्यासाठी मजरेवाडी जॅकवेलकडे ३३ के.व्ही. उच्चदाब वीजवाहिनी बसवली जाणार आहे. यासाठी ७७ लाख रुपये मंजूर झाले आहेत त्यामुळे वीजपुरवठा खंडित झाल्यावर दुसऱ्या लाईनमधून वीजपुरवठा जोडण्यात येणार आहे.नगरोत्थान महाभियान जिल्हास्तरांतर्गत जलशुद्धीकरण केंद्रात ९ लाख लिटर क्षमतेचे संप व पंप हाऊस उभारणीचे काम करण्यात येणार आहे. यासोबतच बस-बार पॅनेल आणि EOT क्रेन बसविणेही हाती घेण्यात आले आहे. यासाठी ८९ लाख रुपये निधी मंजूर आहे. पंचगंगा नदी नळ पाणीपुरवठा योजनेसाठी दाबनलिका बदलण्यासाठी योजनेच्या पाईपलाइनमधील १५०० मीटर भाग खराब झाल्याने त्याऐवजी नवीन पाईपलाइन टाकली जाणार आहे. यासाठी ५ कोटी रुपयांचा निधी मंजूर झाला आहे.

 शहरातील विविध  ७३ कूपनलिका विहिरींवर दुरुस्तीची कामे करण्यात येणार असून,यासाठी १.३० कोटी रुपये निधी मंजूर झाला आहे. महाराष्ट्र सुवर्ण जयंती नगरोत्थान २०२३-२४ अंतर्गत ६ उंच पाण्याच्या टाक्या उभारणी प्रकल्प,शहरातील पाणी वितरण सुधारण्यासाठी ६ नवीन उंच पाण्याच्या टाक्यांचे बांधकाम करण्यात येणार आहे. यासाठी ३१.३७ कोटी रुपयांचा निधी मंजूर झाला आहे.नवीन उभारल्या जाणाऱ्या ६ पाण्याच्या टाक्यात  पी. बा. पाटील मळा,शांती नगर,दत्त मंदिर जवळ,जुना चंदूर रोड,तोरणा नगर,तुळजाभवानी नगर येथे ७ एमएलडी पाणी साठा होणार आहे अशी माहिती आ.राहुल आवाडे यांनी दिली. शहरातील पाणीपुरवठा समस्येवर कायमस्वरूपी तोडगा काढण्यासाठी या सर्व योजनांची अंमलबजावणी तातडीने केली जाणार असल्याचे आश्वासन यावेळी देण्यात आले.

यावेळी अमृत भोसले,प्रकाश दत्तवाडे,प्रकाश मोरे,बाळासाहेब कलागते,दीपक सुर्वे,जयेश बुगड, शेखर शहा,राजू बोंद्रे,संजय केंगार, सतीश पंडित,दीपक पाटील, नरसिंह पारीक उपस्थित होते.