डीकेटीईच्या मेकॅनिकल विद्यार्थ्यांची ‘टेस्ला’मध्ये भक्कम कामगिरी

इचलकरंजी:

इचलकरंजी येथील डीकेटीई संस्थेच्या मेकॅनिकल अभियांत्रिकी विभागातील माजी विद्यार्थ्यांनी जागतिक पातळीवर उल्लेखनीय यश संपादन करत अमेरिकास्थित Tesla, Inc. या जगविख्यात कंपनीत भक्कम कामगिरी बजावली आहे. त्यांच्या या यशामुळे संस्थेच्या गुणवत्तापूर्ण शिक्षणपद्धतीला आणि उद्योगाभिमुख प्रशिक्षणाला आंतरराष्ट्रीय स्तरावर मान्यता मिळत असल्याचे अधोरेखित झाले आहे.

मेकॅनिकल इंजिनिअरिंगचे माजी विद्यार्थी सुहास जाधव, वैभव भोईटे, निखील हुल्ले आणि अमोघ सहस्त्रबुध्दे हे सध्या टेस्लामध्ये विविध तांत्रिक जबाबदाऱ्या सांभाळत असून त्यांनी आपल्या कौशल्याच्या बळावर जागतिक उद्योगविश्वात ठसा उमटवला आहे. अत्याधुनिक तंत्रज्ञानाशी सुसंगत कामगिरी करत त्यांनी डीकेटीई व इचलकरंजीचे नाव अभिमानाने उंचावले आहे.

टेस्ला ही इलेक्ट्रिक वाहन आणि स्वच्छ ऊर्जा क्षेत्रातील अग्रगण्य कंपनी मानली जाते. इलेक्ट्रिक कार, ऊर्जा साठवण आणि सौरऊर्जा तंत्रज्ञानात आघाडीवर असलेल्या या कंपनीने ऑटोमेशन, कृत्रिम बुद्धिमत्ता आणि नाविन्यपूर्ण तंत्रज्ञानाच्या जोरावर जागतिक स्तरावर वेगळी ओळख निर्माण केली आहे.

डीकेटीई संस्थेमध्ये विद्यार्थ्यांच्या सर्वांगीण विकासासाठी प्रोजेक्ट-आधारित शिक्षण, अत्याधुनिक प्रयोगशाळा, उद्योगसंलग्न अभ्यासक्रम, इंटर्नशिप आणि संशोधनाला विशेष प्रोत्साहन दिले जाते. त्यामुळे विद्यार्थ्यांमध्ये केवळ सैद्धांतिक ज्ञानच नव्हे, तर प्रत्यक्ष उद्योगातील आव्हानांना सामोरे जाण्याची क्षमता विकसित होते. सॉफ्टवेअर, ऑटोमेशन, डिझाइन आणि अभियांत्रिकी कौशल्यांचा समन्वय साधत विद्यार्थ्यांनी उत्कृष्ट समस्या निराकरण आणि नवोन्मेषक्षमतेचा प्रत्यय दिला आहे.

सध्याच्या वेगाने बदलणाऱ्या औद्योगिक वातावरणात आंतरविद्याशाखीय कौशल्य असलेल्या अभियंत्यांची मागणी वाढत असताना, डीकेटीईने उद्योगांच्या गरजांनुसार अभ्यासक्रमात आवश्यक बदल केले आहेत. विद्यार्थ्यांना जागतिक स्तरावर स्पर्धात्मक बनविण्यासाठी केलेल्या प्रयत्नांमुळेच अशा नामांकित कंपन्यांमध्ये त्यांची निवड होत आहे. तसेच, माजी विद्यार्थी आणि उद्योग यांच्यातील मजबूत संबंधांमुळे मेकॅनिकल विभागाच्या प्लेसमेंटला अधिक बळ मिळत आहे.

या यशाबद्दल संस्थेचे अध्यक्ष कल्लाप्पाण्णा आवाडे, माजी मंत्री प्रकाश आवाडे, मानद सचिव डॉ. सपना आवाडे, कार्यकारी संचालक रवी आवाडे तसेच सर्व विश्वस्तांनी विद्यार्थ्यांचे अभिनंदन केले. यासाठी संस्थेच्या संचालिका प्रा. डॉ. एल. एस. आडमुठे, उपसंचालक डॉ. यू. जे. पाटील, विभागप्रमुख डॉ. व्ही. आर. नाईक आणि टीपीओ जी. एस. जोशी यांचे मार्गदर्शन लाभले.