यंत्रमाग बंद ठेवून प्रश्न सुटणार नाही-आ.राहुल आवाडे,मजुरीवाढीसाठी पॉवरलूम असोसिएशन मार्फत प्रयत्न करू
इचलकरंजी:
खर्चीवाल्या यंत्रमागधारकांच्या मजुरीवाढीच्या प्रश्नावर शनिवारी रात्री आंदोलन अधिक तीव्र झाले. रात्री आठ वाजण्याच्या सुमारास खर्चीवाल्या यंत्रमागधारकांच्या प्रतिनिधींनी आ.राहुल आवाडे यांच्या कार्यालयावर मोर्चा काढत मजुरी प्रश्नात तातडीने लक्ष घालून तोडगा काढण्याची मागणी केली.
यावेळी आमदार राहुल आवाडे यांनी कारखाने बंद करून प्रश्न सुटणार नसल्याचे सांगत, ज्या ट्रेडिंगधारकांकडून वैयक्तिक पातळीवर मजुरीवाढ दिली जात नाही त्यासंदर्भात पॉवरलूम असोसिएशनच्या माध्यमातून मार्ग काढण्याचा प्रयत्न करू, असे आश्वासन दिले.
मात्र मोर्चेकऱ्यांनी वैयक्तिक तोडगा नको, तर सर्व संबंधित घटकांची सार्वजनिक बैठक बोलावून मजुरीवाढीबाबत अधिकृत करार करण्यात यावा, अशी ठाम भूमिका मांडली. त्यामुळे चर्चेदरम्यान काही काळ वातावरण तणावपूर्ण झाले होते.
अखेर सर्व घटकांच्या प्रतिनिधींना एकत्र बोलावून चर्चेतून तोडगा काढण्याचे आश्वासन आमदार राहुल आवाडे यांनी दिल्यानंतर मोर्चेकऱ्यांनी माघार घेतली.
या बैठकीत प्रकाश आवाडे, बाळासाहेब कलागते,नंदकुमार लोखंडे,योगेश वाघमारे,शहाजी भोसले यांनी आपापली भूमिका मांडली. जवळपास तासभर या विषयावर सविस्तर चर्चा झाली.
