इचलकरंजीत व्यापाऱ्याच्या घरातून 10 लाखांहून अधिक किमतीचे सोन्याचे दागिने चोरीला
इचलकरंजी:
शहरातील यशोलक्ष्मी नगर परिसरात व्यापाऱ्याच्या घरातून तब्बल १०लाख ६८ हजार रु किंमतीचे सोन्याचे, चांदीचे आणि मोत्याचे दागिने अज्ञात चोरट्यांनी लांबविल्याची घटना उघडकीस आली आहे. या प्रकरणी शिवाजीनगर पोलीस ठाण्यात गुन्हा दाखल करण्यात आला आहे.
पोलिसातून मिळालेल्या माहितीनुसार, फिर्यादी आनंद श्रीनिवास मर्दा (वय ४७, व्यवसाय – कापड व्यापार, रा. यशोलक्ष्मी नगर, इचलकरंजी) यांनी दिलेल्या तक्रारीनुसार, दिनांक १६ ऑक्टोबर रोजी रात्री ११ वाजेच्या सुमारास ते १९ ऑक्टोबर रोजी सकाळी १० वाजेपर्यंतच्या दरम्यान त्यांच्या घरातील बेडरूममधील लाकडी कपाटातील ड्रॉवरमधून अज्ञात चोरट्याने मौल्यवान दागिने चोरून नेले.
चोरीस गेलेल्या दागिन्यांमध्ये विविध प्रकारचे सोन्याचे नेकलेस, मंगळसूत्रे, अंगठ्या, नाणी, बेसलेट आणि चांदीची पूजेसाठी ठेवलेली गाय यांचा समावेश असून, एकूण अंदाजे १०,६८,००० रुपयांचा मुद्देमाल चोरीस गेला आहे.
फिर्यादी यांच्या पत्नी सौ. पल्लवी मर्दा यांनी प्रथम ही चोरी लक्षात घेतली. घरातील कामगार व काही नातेवाईकांवर प्राथमिक संशय व्यक्त करण्यात आला असून, पोलिसांनी त्यांच्याकडून चौकशी सुरू केली आहे.
या प्रकरणी गुन्हा दाखल करण्यात आला असून, पुढील तपास सहाय्यक फौजदार कसेकर करत आहेत.
तपासावर पोलीस निरीक्षक गायकवाड यांचे मार्गदर्शन आहे.
