अखंड नाम, जप, यज्ञ व सप्ताह सोहळा; स्वामी समर्थ पुण्यतिथीनिमित्त धार्मिक कार्यक्रमांची रेलचेल
इचलकरंजी :
नदिवेस येथील अखिल भारतीय श्री स्वामी समर्थ गुरुपीठाच्या वतीने श्री स्वामी समर्थ पुण्यतिथीनिमित्त अखंड नाम, जप, यज्ञ व सप्ताह सोहळ्याचे आयोजन करण्यात आले आहे. ८ ते १५ एप्रिल २०२६ या कालावधीत हा धार्मिक सोहळा विविध कार्यक्रमांनी उत्साहात पार पडणार आहे.
बुधवार, ८ एप्रिल रोजी ग्रामदेवता मान-सन्मान व मंडळ मांडणीने सोहळ्याची सुरुवात होणार आहे. गुरुवार, ९ एप्रिल रोजी मंडळ स्थापना, अग्निस्थापना व देवतांचे हवन होऊन सकाळी आरतीनंतर गुरूचरित्र वाचनास प्रारंभ होईल.
यापुढील कार्यक्रमांमध्ये शुक्रवार, १० एप्रिल रोजी श्री गणेश याग व मनोबोध याग, शनिवार, ११ एप्रिल रोजी चंडी याग, रविवार, १२ एप्रिल रोजी श्री स्वामी याग, सोमवार, १३ एप्रिल रोजी गीता याग, तसेच मंगळवार, १४ एप्रिल रोजी रुद्र याग व महारुद्र याग आयोजित करण्यात आले आहेत.
बुधवार, १५ एप्रिल रोजी बली पूर्णाहुती, श्री सत्यदत्त पूजन व देवता विसर्जनाने सोहळ्याची सांगता होणार आहे. या कालावधीत त्रिकाळ आरती व अखंड नामजप सुरू राहणार असून भाविकांनी मोठ्या संख्येने सहभागी व्हावे, असे आवाहन सेवा केंद्राच्या वतीने करण्यात आले आहे.
