आ.प्रकाश आवाडेंच्या फंडातून चंदूरात २७ कोटींच्या विकासकामांचा शुभारंभ.
चंदूर (ता.हातकणंगले) येथे आमदार प्रकाश आवाडे यांच्या माध्यमातून मंजूर 27 कोटी रुपये खर्चाच्या विविध विकासकामांचा शुभारंभ आमदार प्रकाश आवाडे, माजी जिल्हा परिषद सदस्य डॉ. राहुल आवाडे यांच्या हस्ते पार पडला. याप्रसंगी मौश्मी आवाडे यांची प्रमुख उपस्थिती होती.
पर्यटन विकास योजना अंतर्गत चंदूर येथील नदीघाट परिसर सुशोभिकरण, प्रभाग क्रमांक 1 ते 6 मधील सभागृह बांधणे, रस्ते, गटारी, दलित वस्ती सुधार अशा विविध विकासकामांच्या शुभारंभाचा कार्यक्रम महासिद्ध मंदिर हॉलमध्ये पार पडला.
आमदार प्रकाश आवाडे यांनी, शहराला सध्या शुद्ध व मुबलक पाणी मिळण्यासाठी कृष्णा योजना बळकट व्हायला पाहिजे. पंचगंगा नदी शुद्ध कशी ठेवायची, हे कोण बघत नाहीत. परमेश्वर कशी बुद्धी देईल, तसे ते वागू देत. आम्हाला कुणाला काय सांगायचं नाही, असे म्हणत विरोधकांचा समाचार घेतला. तसेच सुळकूड पाणी योजनेसंदर्भात पालकमंत्री हसन मुश्रीफ यांनी जिल्हाधिकार्यांकडे बैठक लावावी. त्यामध्ये योजना कार्यान्वित करण्यासंदर्भात मी योग्य पर्याय देतो. माझ्याकडे प्लॅन तयार असल्याचे सांगितले.
डॉ. राहुल आवाडे यांनी, आमदार प्रकाश आवाडे यांनी विकासकामांसाठी निधीचा महापूर आणला आहे. आगामी विधानसभेसाठी मला तुमचे आशीर्वाद देऊन माझ्या पाठीशी भक्कमपणे रहावे. यंदा चंदुर गावचा आमदार झाला पाहिजे. त्यासाठी मतरुपी आशीर्वाद मला द्यावा, असे आवाहन केले.
कार्यक्रमात राहुल आवाडे, वडगाव बाजार समितीचे उपसभापती जगोंडा पाटील यांनी मनोगत व्यक्त केले. सरपंच स्नेहल कांबळे यांनी स्वागत केले. पं.स.चे माजी सभापती महेश पाटील यांनी प्रास्ताविकात सर्व मंजूर योजनांचा आढावा घेतला.
कार्यक्रमास उपसरपंच स्वाती कदम, शालन पाटील, धुळाप्पा पुजारी, दशरथ मलकापुरे, बसवराज पाटील, भाऊसाहेब पाटील, बाबासाहेब पाटील, वैशाली पाटील, संदीप कांबळे, संजय जिंदे, फिरोज शेख, सचिन हळदे, मारुती पुजारी, रुपाली पुजारी, कुमार कांबळे आदींसह ग्रामपंचायतीचे सदस्य, ग्रामस्थ उपस्थित होते.
