घरफोडी प्रकरणातील दोन आरोपींना  ८०,००० च्या मुद्देमालासह अटक,शहापूर पोलिसांची कारवाई.

इचलकरंजी

शहापूर पोलीस ठाणे गुन्हे शोध पथकाने रेकॉर्डवरील दोन आरोपींना अटक करून त्यांच्याकडून १० ग्रॅम सोन्याचे दागिने व मोबाईल हँडसेट असा एकूण ₹८०,०००/- किमतीचा मुद्देमाल हस्तगत केला आहे.

४ नोव्हेंबर रोजी रात्री महात्मा फुले सोसायटी, शहापूर येथे राहत्या घराचे कुलूप तोडून चोरी झाली. शोकेसमधून सोन्याचे दागिने व मोबाईल चोरीस गेल्याबाबत फिर्यादीने तक्रार दाखल केली होती.

याबाबत गुन्हे शोध पथकातील पोलीस अंमलदार असिफ कलायगार यांना बातमीदारामार्फत मिळालेल्या गुप्त माहितीच्या आधारे तपास करण्यात आला.अतिक नजीर कुरेशी (वय २१) – राहणार: शहापूर, चावडी जवळ, ता. हातकणंगले व आकाश राजेंद्र देशींगे (वय २१) – राहणार: धनगर गल्ली, शहापूर, ता. हातकणंगले यांना ताब्यात घेऊन चौकशी केली असता त्यांनी गुन्ह्याची कबुली दिली त्यांच्याकडून चोरी केलेला १० ग्रॅम सोन्याचे दागिने – ७५,०००/-, सॅमसंग मोबाईल हँडसेट – ५,०००/- असा ८०,०००/- चा मुद्देमाल हस्तगत केला.

वरील कारवाई पोलीस अधीक्षक, कोल्हापूर महेंद्र पंडित,अप्पर पोलीस अधीक्षक, गड विभाग,कॅम्प इचलकरंजी,निकेश खाटमोडे उपविभागीय पोलीस अधिकारी समीरसिंह साळवे यांच्या मार्गदर्शनाखाली पो. नि. श्री. सचिन सूर्यवंशी,पोलीस अंमलदार: अविनाश मुंगसे, असिफ कलायगार, रोहित डावळे, आयुब गडकरी, शशिकांत ढोणे, साजिद कुरणे यांच्या पथकाने केली. आरोपी अतिक नजीर कुरेशी याच्यावर यापूर्वी जयसिंगपूर पोलीस ठाण्यात घरफोडीचा गुन्हा दाखल आहे.

सदर गुन्ह्याचा तपास पोलीस अंमलदार साजिद कुरणे हे वरिष्ठ अधिकाऱ्यांच्या मार्गदर्शनाखाली करत आहेत.