इचलकरंजी येथे संगीत नाट्य स्पर्धा २६ जानेवारी पासून सुरवात.

इचलकरंजी:

राज्य शासनाच्या सांस्कृतिक कार्य संचालनालयामार्फत आयोजित केलेल्या ६३व्या महाराष्ट्र राज्य संगीत नाट्य  स्पर्धेची अंतिम फेरी इचलकरंजी येथील श्रीमंत ना. बा. घोरपडे नाट्यगृह येथे २६ जानेवारी २०२५ पासून सुरु होत आहे. सांस्कृतिक कार्य मंत्री श्री. आशिष शेलार आणि सांस्कृतिक कार्य विभागाचे अपर मुख्य सचिव श्री. विकास खारगे यांच्या मार्गदर्शनाखाली या स्पर्धेचे आयोजन करण्यात येत आहे.

दिनांक २६ जानेवारी २०२५ ते दिनांक १० फेब्रुवारी २०२५ दरम्यान श्रीमंत घोरपडे नाट्यगृह येथे संपन्न होणाऱ्या स्पर्धेत एकूण १६ संगीत नाटकांचे सादरीकरण होणार आहे.

सातत्याने ६२ वर्ष चालणारी ही संगीत नाट्य स्पर्धा आहे. दररोज सायंकाळी ७.०० वाजता प्रयोग सादर होणार आहेत. संगीत नाटकांचे प्रयोग पाहण्यासाठी नाममात्र रु. १५/- व रु. १०/- इतक्या कमी रकमेची तिकीटे ठेवण्यात आलेली आहेत.

संगीत नाटक पाहण्यासाठी  तसेच  त्यांना दाद देण्यासाठी जास्तीत जास्त रसिक प्रेक्षकांनी उपस्थित राहावे, असे आवाहन सांस्कृतिक कार्य संचालक श्री. बिभीषण चवरे यांनी केले आहे.

सदर स्पर्धेचे नियोजन नाट्य परिषद शाखा इचलकरंजी आणि इचलकरंजीतील विविध नाट्यसंस्था करीत आहेत.