विभागीय जिल्हा नियोजन बैठकीत आ.राहुल आवाडे आक्रमक, जीएसटी परताव्यासह आयजीएम सुधारणा व स्मारकांचे प्रश्न उपस्थित.

पुणे

यादीत नांवच समाविष्ट नसलेने इचलकरंजी महानगरपालिकेचा प्रलंबित असलेला १००९ कोटी रुपयांचा जीएसटी परतावा तातडीने मिळावा या संदर्भात बैठक घेण्यासह इंदिरा गांधी सामान्य रुग्णालयासाठी आवश्यक स्टाफ, अत्याधुनिक मशिनरी आणि एमआरआय मशिन उपलब्ध करुन द्यावे,  ऐतिहासिक माणगांव येथील राजर्षि छत्रपती शाहू महाराज व डॉ. बाबासाहेब आंबेडकर यांच्या संयुक्त स्मारकासाठीचा निधी तातडीने मिळावा आदी विविध प्रश्‍न पुणे येथील जिल्हा वार्षिक नियोजन राज्यस्तरीय बैठकीत आमदार राहुल आवाडे यांनी परखडपणे मांडले.
पुणे विभागीय आयुक्त कार्यालयात राज्याचे उपमुख्यमंत्री तथा अर्थमंत्री अजितदादा पवार यांच्या अध्यक्षतेखाली कोल्हापूर जिल्हा वार्षिक नियोजन सन २०२५-२६ ची राज्यस्तरीय बैठक पार पडली. या बैठकीमध्ये आमदार राहुल आवाडे यांची इचलकरंजी शहराशी संबंधित व प्रलंबित प्रश्‍नांची मांडणी करत हे प्रश्‍न तातडीने मार्गी लावण्याची मागणी केली. बैठकीत पालकमंत्री प्रकाश आबिटकर, सहपालकमंत्री माधुरी मिसाळ, जिल्हाधिकारी अमोल येडगे यांच्यासह संबंधित अधिकारी उपस्थित होते.
सन २०२२ मध्ये इचलकरंजी नगरपरिषदेचे रुपांतर महानगरपालिकेत झाले. दोन वर्षापासून शासनाने महानगरपालिकांना जीएसटी प्रतिपूर्ती अनुदान वर्ग केलेले आहे. परंतु जीएसटी परताव्याच्या यादीत इचलकरंजी महानगरपालिकेचे नांवच समाविष्ट करण्यात आलेले नाही. त्यामुळे नोव्हेंबर २०२४ अखेर तब्बल १००९ कोटी रुपयांचे अनुदान थकीत आहे. जीएसटी परताव्याच्या यादीत इचलकरंजी महानगरपालिकेचे नाव नसल्याकारणाने या प्रलंबित विषयाबाबत तातडीची बैठक घेण्यात यावी अशी मागणी आमदार आवाडे यांनी केली.
इचलकरंजीतील इंदिरा गांधी सामान्य रुग्णालय हे हातकणंगले व शिरोळ तालुक्यांसह नजीकच्य सीमावर्ती भागातील नागरिकांसाठी आधारवड आहे. या रुग्णालयास 300 बेडची मंजुरीही राज्य शासनाने दिलेली आहे. परंतु त्या मानाने या रुग्णालयास आवश्यक तो स्टाफ, अत्याधुनिक मशिनरी आदी मंजूर नसल्याने येणार्‍या रुग्णांवर उपचार करण्यात अडचणी येत आहेत. त्यामुळे ३०० बेड क्षमतेच्या प्रमाणात याठिकाणी आवश्यक स्टाफ व यंत्रणा उपलब्ध करण्यात यावी. तसेच मंजूर केलेले एमआरआय मशिनही लवकरात लवकर उपलब्ध करुन द्याव्यात.
हातकणंगले तालुक्यातील ऐतिहासिक माणगांव येथे भारतरत्न डॉ. बाबासाहेब आंबेडकर व राजर्षि छत्रपती शाहू महाराज यांचे संयुक्त स्मारक उभारण्यात येणार आहेत. या स्मारकाच्या आराखड्यानुसार प्रस्तावित कामासाठी १९९ कोटीचा निधीस आगामी अर्थसंकल्पात मंजूरी देऊन तो तातडीने उपलब्ध व्हावा, अशी मागणीही आमदार आवाडे यांनी केली.
महानगरपालिकेच्या रविंद्रनाथ टागोर वाचनालय इमारतीचे नुतनीकरण करण्यात येत आहे. याठिकाणी स्पर्धा परीक्षांचा अभ्यास करुन अनेक विद्यार्थी-विद्यार्थीनी आज विविध उच्च पदावर कार्यरत आहेत. त्याचदृष्टीने हे वाचनालय अद्ययावत व्हावे व त्याठिकाणी आवश्यक त्या सर्व सुविधा उपलब्ध व्हाव्यात यासाठी निधीची मागणी केली असून तोसुध्दा तातडीने मिळावा, असेही आमदार आवाडे यांनी सांगितले.