इचलकरंजी शहरात वाहतुकीचा बोजवारा

इचलकरंजी शहरात वाहतुकीचा बोजवारा

इचलकरंजी :

शहरात गणेशोत्सव काळात वाहतुकीचे नियोजन पूर्णपणे कोलमडले असून मुख्य रस्त्यांवर मोठ्या प्रमाणात वाहतूक कोंडी होत आहे. काही दिवसांपूर्वी जिल्हा पोलिस प्रमुखांनी गणेशोत्सव मंडळांची बैठक घेऊन शिस्तबद्ध नियोजनाचे आदेश दिले होते. तसेच महानगरपालिकेनेही सार्वजनिक प्राधिकरणांच्या बैठकीत सूचना केल्या होत्या. मात्र प्रत्यक्षात नियोजनाचा अभाव ठळकपणे जाणवत आहे.

गर्दीच्या ठिकाणी वाहतूक पोलिसांचा अभाव असून, काही ठिकाणी ते फक्त दबा धरून बसल्याचे नागरिकांच्या लक्षात येत आहे. यामुळे वाहतूक सुरळीत करण्याऐवजी गोंधळ अधिक वाढला आहे. अवजड वाहनांच्या हालचालींवर कुठलेही नियंत्रण नसल्याने समस्या अधिक गंभीर बनली आहे.

वाहतूक बंदी वेळेच्या कालावधीतसुद्धा शहराच्या मुख्य रस्त्यांवरून ट्रॅव्हल गाड्या फिरताना दिसत असून यामुळे वाहतूक कोंडी वाढत आहे. वाहतूक शाखेच्या दुर्लक्षामुळे नागरिकांमध्ये प्रचंड नाराजी व्यक्त होत आहे.