पूर्ववैमनस्यातून जातीवाचक शिवीगाळ करीत दाम्पत्यावर कोयत्याने जीवघेणा हल्ला 

पूर्ववैमनस्यातून जातीवाचक शिवीगाळ करीत दाम्पत्यावर कोयत्याने जीवघेणा हल्ला 

इचलकरंजी

कबनूर (ता. हातकणंगले) येथे शनिवारी सकाळी ग्रामपंचायत समोर दाम्पत्यावर कोयत्याने जीवघेणा हल्ला झाल्याची धक्कादायक घटना घडली. याप्रकरणी शिवाजीनगर पोलीस ठाण्यात विविध कलमान्वये गुन्हा दाखल करण्यात आला आहे.

फिर्यादी प्रमोद बाबासो शिंगे (वय ३९, रा. सिद्धार्थनगर, कबनूर) हे आपल्या गाडीत बसले असताना आरोपी जमीर मुलाणी (वय ५०), आर्यन मुलाणी (वय ३०, रा. जांभळी, ता. शिरोळ) व त्यांचे दोन अनोळखी मित्र घटनास्थळी आले. फिर्यादींच्या मित्राने आरोपीच्या मुलीशी कोर्ट मॅरेज केले होते व त्यास फिर्यादी यांनी मदत केली होती.तो राग मनात धरून शिवीगाळ करत हल्ला केला.

आरोपींनी कोयत्याने वार करून फिर्यादींच्या उजव्या हाताचे एक बोट तोडले तसेच हात व खांद्यावर गंभीर दुखापत केली. फिर्यादींची पत्नी अश्विनी शिंगे यांनाही उजव्या हातावर वार करून जखमी केले. यावेळी गाडी फोडूनही नुकसान करण्यात आले.

या प्रकरणी गुन्हा दाखल करण्यात आला आहे. तपास मा.विक्रांत गायकवाड, उपविभागीय पोलीस अधिकारी, इचलकरंजी विभाग यांच्याकडे असून, प्रभारी अधिकारी स.पो.नि. वायदंडे आहेत.