भरधाव कारची तीन मोटरसायकलींना धडक – दोन जखमी, ६५ हजारांचे नुकसान

भरधाव कारची तीन मोटरसायकलींना धडक – दोन जखमी, ६५ हजारांचे नुकसान

इचलकरंजी:

कबनुर ते शाहुपुतळा जाणाऱ्या रस्त्यावर कमल खानावळ समोर शनिवारी रात्री उशिरा भरधाव कारने तीन मोटरसायकलींना जोरदार धडक दिल्याची घटना घडली. या अपघातात दोन तरुण किरकोळ जखमी झाले असून सुमारे ६५ हजार रुपयांचे नुकसान झाले आहे.

शिवाजीनगर पोलीस ठाण्यात याबाबत गुन्हा दाखल करण्यात आला असून आरोपी कारचालक मयुरेश भरत संगाज (रा. लायकर टॉकीज मागे, इचलकरंजी) असा आहे.

फिर्यादी आकाश श्रीकांत पिंगट (वय २५, रा. ए.एस.सी. कॉलेज जवळ, पाटील मळा, इचलकरंजी) यांनी दिलेल्या फिर्यादीत म्हटले आहे की, रात्री सुमारे ११ वाजता आरोपीने आपल्या ताब्यातील स्वीप्ट डिझायर (क्र. MH-12-QF-5786) ही कार बेदरकारपणे व वेगात चालवून त्यांच्या मोटरसायकलला (क्र. MH-51-D-5934) मागून धडक दिली. त्यानंतर त्याच कारने MH-09-FV-7610 व MH-09-DS-0431 या मोटरसायकलींनाही धडक दिली.

अपघातात फिर्यादी आकाश पिंगट आणि साक्षीदार अब्बास हुसेन पटेकरी (रा. भोने मळा, इचलकरंजी) किरकोळ जखमी झाले. तिन्ही मोटरसायकलींचे मिळून सुमारे ६५ हजार रुपयांचे नुकसान झाले आहे. घटनेनंतर आरोपी कार घेऊन पळून गेला.

या प्रकरणी  गुन्हा दाखल झाला असूनबतपास पो.हे.कॉ. रोटीवाले यांच्या मार्गदर्शनाखाली सुरू असून प्रभारी अधिकारी सपोनि वायदंडे आहेत.