उमेदवारी कापून तिकीट विकल्याचा आरोप; शिवसेना युवती सेना जिल्हाप्रमुख सलोनी शिंत्रे आक्रमक

इचलकरंजी:

 शिवसेना (शिंदे गट) युवती सेना जिल्हाप्रमुख सलोनी शिंत्रे यांनी उमेदवारी कापून तिकीट विक्री केल्याचा गंभीर आरोप जिल्हाप्रमुख रविंद्र माने यांच्यावर केला आहे. गेल्या अनेक वर्षांपासून पक्षात कार्यरत असून २०२२ पासून निवडणुकीची तयारी करत असतानाही, शेवटच्या टप्प्यात अन्य व्यक्तींना तिकीट देण्यात आले असल्याचा आरोप त्यांनी पत्रकार परिषदेत केला.

सलोनी शिंत्रे म्हणाल्या की, गेल्या महिन्यापासून जिल्हाप्रमुख त्यांच्याशी संवाद टाळत होते. भाजपमधून प्रवेश केलेल्या कार्यकर्त्यांना पैसे घेऊन तिकीट देण्यात आले, असा आरोप त्यांनी केला. त्यामुळे त्या अपक्ष म्हणून निवडणूक लढवत असल्याचे त्यांनी स्पष्ट केले. “इचलकरंजीतील मूळ शिवसैनिकांवर अन्याय होत आहे. शिवसेना कमकुवत करण्याचा प्रयत्न होत असून पक्ष संघटनेला यामुळे मोठा फटका बसणार आहे,” असेही त्या म्हणाल्या.

पक्षातील उमेदवारी वाटपावर टीका करताना शिंत्रे यांनी सांगितले की, लढवण्यात आलेल्या ११ जागांपैकी केवळ ३ जागा मूळ शिवसैनिकांना देण्यात आल्या असून उर्वरित ठिकाणी आयात उमेदवारांना प्राधान्य देण्यात आले आहे. काही प्रभागांत “मैत्रीपूर्ण लढत” घडवून आणून पक्षाचे नुकसान केले जात असल्याचा आरोप त्यांनी केला. “स्वतः नगरसेवकपद मिळवण्यासाठी भाजपसोबत तडजोड करून त्यांच्या उमेदवारांना शिवसेनेच्या चिन्हावर उभे करण्यात आले,” असा दावा सलोनी शिंत्रे यांनी केला.