प्रतापगडावरून जपानपर्यंत – शिवज्योतीचा ऐतिहासिक प्रवास! यंदा जपानमध्ये शिवजयंतीची जय्यत तयारी सुरू!

 टोकियो-

जपानमध्ये यंदा शिवजयंतीच्या भव्य तयारीने जोर धरला आहे. छत्रपती शिवाजी महाराजांच्या पराक्रमाला आदरांजली वाहण्यासाठी भारत कल्चरल सोसायटी (BCS) जपानने एक अनोखी संकल्पना साकारली आहे. प्रतापगडावर विधिवत पूजन केलेली शिवज्योत यंदा थेट जपानच्या भूमीत पोहोचणार आहे.

सत्तर वर्षांनंतर प्रथमच जपानमध्ये शिवजयंती साजरी झाल्यानंतर, यंदाही शिवजयंती उत्सवात भव्य पालखीतून महाराजांच्या मूर्तीची मिरवणूक, लेझीम, ढोल-ताशा, फेट्यांचा थाट, तसेच शिवचरित्रावर आधारित भव्य महानाट्य सादर करण्यात येणार आहे.

प्रतापगडाची शिवज्योत जपानच्या भूमीत पोहोचणार:

गत वर्षाप्रमाणे यंदा जपानमधील शिवजयंतीचे वैशिष्ट्य ठरणार आहे प्रतापगडावरून जपानला नेली जाणारी शिवज्योत. महाराष्ट्रात जशी शिवजयंती गडांवरून मशालीच्या प्रकाशात साजरी केली जाते, तीच परंपरा पाळत भारत कल्चरल सोसायटी जपानने प्रतापगडावर विधिवत पूजा करून ही मशाल जपानला नेण्याचे नियोजन केले आहे.

याकरिता संस्थेचे कार्यकर्ते अनिकेत पाटील यांच्या सोबत बळवंत पाटील, महेश मोरे आणि स्थानिक सदस्यांनी प्रतापगडला भेट दिली. या वेळी क्रांतिवीर फिरंगोजी शिंदे मर्दानी आखाडा गिरगाव, कोल्हापूरचे वस्‍ताद प्रमोद पाटील आणि त्यांच्या सहकाऱ्यांनी शिवकालीन मर्दानी खेळांचे प्रात्यक्षिक करून विशेष सहकार्य केले.

भव्य कार्यक्रमाचे प्रमुख पाहुणे:

जपानमधील या ऐतिहासिक शिवजयंती उत्सवाला भारताचे जपानमधील राजदूत श्री सिबी जॉर्ज हे प्रमुख पाहुणे म्हणून उपस्थित राहणार आहेत. त्याचबरोबर टोकियोमधील स्थानिक महापौर, जपानमधील विविध भारतीय व जपानी संस्थांचे प्रतिनिधी, तसेच सुमारे २०० हून अधिक जपानी नागरिक या कार्यक्रमाला महाराजांना आदरांजली वाहण्यासाठी उपस्थित राहतील.

महानाट्याचे सादरीकरण

सुमारे १०० हून अधिक कार्यकर्त्यांची मेहनत आणि तितक्याच स्थानिक कलाकारांच्या योगदानातून ‘शिवचरित्र’ महानाट्याच्या माध्यमातून शिवरायांचा पराक्रम आणि इतिहास साकारला जाणार आहे त्यामुळे या वर्षीचा शिवजयंती महोत्सव अधिक भव्य आणि भव्यदिव्य होणार आहे.

संस्थेचे सामाजिक कार्य:

भारत कल्चरल सोसायटी (BCS) जपान ही जपानमधील एक सेवाभावी संस्था असून, ती विविध उपक्रमांद्वारे भारतीय आणि जपानी संस्कृतींमध्ये सेतू बांधण्याचे काम करते. रक्तदान शिबिरे, स्वच्छता मोहिमा आणि सामाजिक गरजांसाठी स्वयंसेवक पुरवणे ही त्यांची काही वैशिष्ट्यपूर्ण कामे आहेत.

शिवज्योतीचा प्रकाश जपानच्या भूमीत पसरवणार:

छत्रपती शिवाजी महाराजांच्या तेजस्वी पराक्रमाचा उजाळा देण्यासाठी आणि त्यांचा इतिहास नव्या पिढीपर्यंत पोहोचवण्यासाठी जपानमधील हा शिवजयंती सोहळा एक प्रेरणादायक ठरेल!